全北汽車往績食住釜山

2020-05-15 10:47:14 来源:网络

今季韓職兩大爭標熱門全北汽車及蔚山現代首輪齊齊贏波,不過全北汽車主場只靠後備上陣嘅李東國完場前絕殺、險勝水原藍翼1比0,論氣勢似乎比唔上大炒尚州尚武4球嘅蔚山現代。由於新加盟嘅前南非國腳韋迪維積克仍有傷在身,全北汽車周六晚作客釜山偶像,可能又要靠李東國做雷霆救兵。

全北汽車今季買入韋迪維積克、梅里路漢歷基及金甫炅等新兵,其中前者因傷錯過上周揭幕戰,後兩者雖然正選上陣,但表現唔算突出,梅里路漢歷基踢咗61分鐘就被另一新兵邦本宜裕代替。全北汽車上場雖然控制大局,但攻勢唔到肉,直至完場前15分鐘,水原藍翼嘅澳洲中場安東尼斯領紅牌,全北汽車恃住人多先攞到絕對優勢。全北汽車嚟緊周六晚將作客新升班嘅釜山偶像,據報韋迪維積克仲未好番,上陣機會唔大,主帥莫理斯正苦惱緊應沿用上場踢正選嘅小將趙圭成,抑或搵後備入替嘅邦本宜裕擔正。

李東國又等數胡
不過無論決定係點,「獅子王」李東國始終最可靠,呢名41歲老將上場60分鐘後備入替,踢到84分鐘就接應角球攻勢,頂入全場唯一入球,刷新自己個K聯賽紀錄,盡顯埋門級數。原來李東國對上6次代表全北汽車上陣鬥釜山偶像從未輸過,一共攞到5勝1和,其中近4次個人仲攻入4球,今輪對住呢碟「私房菜」,又係數胡好時機。