噴射機撻着射爆獅吼

2020-03-20 10:56:25 来源:网络

周五澳職尾場賽事,布里斯班獅吼於中立場昆士蘭鬥紐卡素噴射機。噴射機自從新帥上任及愛爾蘭射手奧當路雲回巢後,戰績全面回升,而且噴射機近7次鬥獅吼攞到5勝2和不敗成績,噴射機平手盤捧得過。

(myTV Gold 302、Now 639、有線655及615台周五下午4時30分直播)

紐卡素噴射機近6場聯賽3勝3和未輸過,目前雖排第9位,但只比第6位嘅西部聯少6分,仍有機會爭入季後賽。噴射機之所以戰績冒升,與威爾斯教頭卡爾羅賓遜接手及前鋒奧當路雲回巢有極大關係。卡爾羅賓遜領軍後噴射機5場聯賽攞到3勝2和,踢法變得簡單直接,當中由獅吼回歸嘅奧當路雲個人喺呢5場比賽交出3個入球及1次助攻,表現可謂如魚得水。奧當路雲季前轉投獅吼表現一般,一直唔受獅吼主帥科拿重視,今次倒戈一定拚盡顯身價。

離開主場獅吼腳軟
獅吼上季聯賽排尾2緣盡季後賽,今季喺利物浦名宿科拿領軍下一洗頹風,現排聯賽榜第4位,極有機會重返季後賽,球隊近6場聯賽贏4仗,表面上近況唔錯,不過呢4場贏波有3場來自佢哋主場,今場比賽改喺中立場舉行,隨時影響獅吼發揮,更何況受新冠肺炎影響,目前所有澳職比賽都要閉門舉行,冇咗主場球迷打氣支持,獅吼喺聲勢方面,恐怕亦大不如前。睇番近年交手成績,噴射機對上7次攞到5勝2和,平手盤捧噴射機。