噴射機上彈轟阿聯

2020-03-15 11:27:35 来源:网络

奧當路雲回巢即翻生
今日下晝繼續有澳職玩,其中尾場由阿德萊德聯主場硬撼紐卡素噴射機。阿聯聯賽3連敗之餘,瘋狂失波猶如不設防,噴射機有神箭奧當路雲回巢後立即反彈,可趁機打落水狗,仲有得受讓必捧讓球客勝。(myTV Gold 302、Now 639、有線655及615台周日下午3時20分直播)

雖然阿聯排名較尾2嘅噴射機高,可惜佢哋狀態陷於低迷,連續3場聯賽輸晒不特止,仲狂失12粒,包括對住攻力一般嘅西悉尼流浪者及西部聯,竟然各失5粒,呢條紙紮防線真係一篤定散,咁樣輸法亦嚴重打擊士氣。噴射機開咧後一直表現不濟,之前仲試過8場聯賽輸7仗,同包尾嘅中岸水手一擔擔。好彩佢哋早前獲得奧當路雲回巢,呢位轉投布里斯班獅吼後冇料到嘅射手,重返噴射機立即有貨交,之前4場聯賽披甲,帶領球隊取得2勝2和走出谷底,佢自己更喺近3場轟入2粒兼交出1次助攻,成為鋒線核心人物,有呢位神箭擔大旗,實在唔赦沉到爆嘅阿聯,仲有得受讓咁筍,讓球客勝咪走寶。

鳳凰弗爆繼續勝利
至於頭場威靈頓鳳凰主場迎戰墨爾本勝利,鳳凰可謂近況最好嘅澳職球隊之一,近5仗聯賽豪取4勝1負,而且佢哋主場向來特醒,開咧後10次喺自己地頭出擊,獲7勝1和2負佳績,單計近5仗主場更加係贏晒,唔講得笑,難怪位居聯賽「3哥」。相反,勝利戰績下滑,近5仗聯賽只得1勝2和2負,包括上輪對FC悉尼被炒四個一皮,仲有左閘賀蘭做埋「紅牌阿姑」,今仗要坐波監,造訪主場勢盛嘅鳳凰,凶多吉少,鳳凰少讓平半,上盤有買趁早。(myTV Gold 302、Now 639、有線655及615台周日下午1時20分直播)