謝四心灰格流難抗利華

2020-03-12 11:16:07 来源:网络

今屆歐霸嚟到16強首回合,隨住些路迪喺上圈被踢出局,蘇超遺珠格拉斯哥流浪於今晚主場迎戰德甲嘅利華古遜。格流近期接連受挫,主帥謝拉特一度萌生退意,確係影響軍心,利華歇冬後愈戰愈勇,超新星夏維斯表現光芒四射,作客讓波冇有怕,上盤捧得過。

(有線656及616台周五凌晨4時直播)

客軍歇冬後12戰10勝
格流今季一度有力挑戰些路迪於蘇超嘅壟斷局面,可惜踏入新年後接連失分,已經落後死敵13分,爭標機會渺茫,蘇足盃又畀赫斯踢出局,搞到主帥謝拉特心灰意冷想劈炮,雖然最終決定留隊,但近2仗只得1勝1負,曾經做過球員嘅我,梗係明白季中問題多多,主帥要撥亂反正唔易,所以好理解「謝四」嘅無奈,不過佢依家似乎冇乜計。

利華古遜向來大起大落,頗有「神經刀」特質,幸好踏入季中明顯有改善,歇冬後12仗正式比賽,豪取10勝1和1負,包括於上圈歐霸雙殺波圖。利華主帥保斯崇尚進攻,令陣中攻擊球員獲得全面釋放,保連奴、禾蘭、里安拜尼及比拿拉比輪流有貨交,最搶眼嘅必屬德國超新星夏維斯,「Kai仔」自歇冬後轟6粒兼交出7次助攻,無論打翼鋒、進攻中場或客串箭頭,都一樣有料到,造訪近況低迷嘅格流,有力搶先機。