辛辛那提做慣黃大仙

2019-07-18 10:56:09 来源:网络

聽朝有兩場美職直播戲碼,阿King認為幾好路,早場FC辛辛那提主場迎戰華盛頓聯隊值得留意,FC辛辛那提正宗「黃大仙」,有「球」必應,開咧後場場有失波,預計會與「華聯」合演入球騷,中位數2.5球嘅大盤有計。

(myTV Gold 301、now 638、有線654及614台周五早上8時直播)

作為今季美職新軍,東岸嘅FC辛辛那提明顯經驗不足,心口掛個勇字係咁衝,上月尾曾作客明尼蘇達聯慘敗7個一皮,近期連贏兩場,算係止住聯賽6連敗嘅頹勢,但仍排緊東岸包尾。辛辛那提最大問題係防守堅弱雞,連盃賽在內,開咧後22場全部都有失波,合共失咗47粒,曳到冇朋友。華聯已經連續3場聯賽未贏過,今仗遇弱一定趁機博反彈,但佢哋貴為東岸前列分子,今仗竟然受讓邊有咁筍呀?睇番華聯射手朗尼近6場有披甲賽事入4粒,遇上有前冇後嘅辛辛那提,轉捧2.5球嘅大盤更上算。

奧城傷兵多半場頂唔住
美職尾場波特蘭伐木者主場對奧蘭多城,伐木者主場特別搶韁,近4次喺自己地頭出擊,有3次在上半場取得領先優勢,「奧城」唔單止有基斯甸希古達、沙恩奧尼爾受傷,當姆戴亞亦要坐波監,隨時半場都頂唔住,半場主勝好路。最後係歐霸外圍賽第1圈次回合,諾高平主場對聖巴特里,首回合諾高平贏2比0,今仗返主場你急佢唔急,可睇定先食,聖巴特里太弱無力收復失地,捧入球細好過。