些路迪薩無赦

2019-07-09 10:11:19 来源:网络

踢歐聯外圍賽駕輕就熟
隨住美洲盃、女子世界盃及金盃三大賽曲終人散,話咁快新一季歐聯又正式展開;今晚上演多場第1圈外圍賽,蘇超班霸些路迪首回合作客波斯尼亞球隊薩拉熱窩。屈指一算,薩拉熱窩對上一次出戰歐聯外圍賽已經係2015年,大賽經驗遠遜對手,些路迪客勝可作為過關重心。

(周三凌晨1時45分開賽)

波斯尼亞近年質素較好嘅球員早向外闖,故此國內聯賽水平唔高,參戰歐聯通常只係陪跑分子,包括今場主角薩拉熱窩,佢哋最近1次出戰歐聯外圍賽都係「一輪遊」,喺當年第2圈外圍賽兩回合計以總比數0比3輸畀波蘭球隊列治普斯納,主、客兩回合都冇入波。相反些路迪近年已慣常出戰歐聯外圍賽,提早開操更加係家常便飯,狀態同實力絕對信得過,今場作客一樣有力旗開得勝。

艾斯坦拿夠贏克盧日
另外兩關先講另一場歐聯外第1圈賽事,哈薩克冠軍艾斯坦拿主場鬥羅馬尼亞代表克盧日。哈薩克足球近年進步神速,艾斯坦拿更加係歐洲賽常客,主場水準有一定保證。克盧日上周末喺國內超級盃輸波而回,狀態麻麻,作客出戰靠唔住,主隊讓半一,捧上盤。

(周二晚9時開賽,馬會網上文字直播)

最後一關,揀周三早上開波南球盃16強首回合,玻利維亞球隊皇家帕里主場鬥哥倫比亞球隊伊基達。皇家帕里有高原地利之助,主場出擊唔易輸;伊基達今屆4場南球盃有3次開半場和,慣性換邊後先發力,一於再追半場和。

(周三早上8時30分開賽,馬會網上文字直播)