PSG 歎慢板吼半場和

2019-04-14 10:22:39 来源:网络

嚟到季尾轉彎入直路階段,各大聯賽冠軍爭逐已開始明朗化,其中今晚法甲尾場上演榜首大戰,由「1哥」巴黎聖日耳門(PSG)作客里爾,PSG只要打和便可提早完成7連冠,心態上毋須急於搶攻,而里爾一向穩陣行先,半場和值得再追。

(myTV Gold 302、Now 639、有線655及615台周一凌晨3時直播)

雖然再次歐聯衝冠失敗,但PSG喺龐大金元政策支援下,早已喺法甲橫行無忌,奪冠只係基本任務及時間問題,依家佢哋喺剩番8輪情況下,已大幅甩開打多1場嘅「2哥」里爾20分咁多,堅誇張,今仗只需打和,便可提早封王兼完成7連冠霸業,既然唔使贏就毋須太心急,尤其係尼馬同卡雲尼仲養緊傷,非常倚賴基利安麥巴比數胡,上輪對斯特拉斯堡畀佢抖抖冇擔正,改用「英冠級數」嘅祖普莫亭,即爆出世紀Miss笑話,搞到打和2比2未能提早封王,今仗唔敢再大意。里爾亦要力保聯賽亞軍,藉此取得直入下屆歐聯分組賽入場券,乘住今輪「3哥」里昂輸波,若有分落袋便可鞏固「2哥」位,加上近8場聯賽7次開半場和,不妨追多鋪。

西甲尾場有「蝙蝠」打吡戰,由華倫西亞主場撼利雲特,華倫有核心干度比亞重傷長抖,費倫托利斯及朗卡尼亞亦要坐波監,況且周中有歐霸8強次回合對維拉利爾後顧,就算首回合贏3比1,但次回合點都重要過聯賽多多聲,利雲特亦要為護級搶分,受讓好路

(Now 632周一凌晨2時45分直播)

燈塔打吡熱拿亞受讓筍
講開打吡,今晚意甲亦有場燈塔打吡,由森多利亞「掛名」主場對同市死敵熱拿亞,之前士哥不斷嘅森多老將射手加利亞雷拉,已連續3場食白果,熱拿亞近況都曳,但出戰打吡戰例打甩髀,近5次掛名作客僅1敗,捧讓球客勝。

(myTV Gold 301、Now 638、有線654及614台周日晚9時直播)