多蒙特半場搞掂法福

2018-09-14 09:50:15 来源:互联网

留力歐聯打閃擊戰
今晚德甲獨腳戲,「4哥」多蒙特主場迎戰法蘭克福。「蜜蜂兵團」今季改由有料新帥法夫爾揸旗,仲帶挈「契仔」馬高列奧斯翻生,表現煥然一新,相反法福自主帥尼高高華人望高處轉教拜仁後,成班波好似散散哋。多蒙特有歐聯顧慮,今場隨時玩閃擊戰,盡快解決法福,半場主勝有計。

(Now 670及Fox+周六凌晨2時30分直播)

多蒙特上季亂七八糟,全因曾協助阿積士奪歐霸亞軍嘅教練保斯冇料扮四條,未到半季就畀炒魷,但中途接手嘅史杜加明知自己只係過渡人選,最終保住前4嘅歐聯入場券算係任務完成。「蜜蜂兵團」有見及此,決定搵有德甲成功經驗嘅教頭掌舵,所以從尼斯請嚟法夫爾接手。呢位瑞士籍主帥上任冇耐,即委任王牌馬高列奧斯做隊長,以往法夫爾曾帶領哈化柏林殺入前4,讓瀕臨降班嘅慕遜加柏死裏逃生,之後更取得歐聯附加賽資格,而嗰兩季喺慕遜加柏就打起咗馬高列奧斯。今次師徒重聚,大家都期望會擦出火花,果然喺首輪反勝RB萊比錫4比1,列奧斯埋齋兼攞到個人喺德甲第100個入球,就算上仗同漢諾威互交白卷,呢位新隊長依然係最搶鏡。

法蘭克福易帥散散哋
相反,上季爆冷事隔30年再奪德國盃嘅法蘭克福,有主帥尼高高華「叛逃」到拜仁,影響極大。球隊搵咗個毫無德甲經驗嘅教練艾迪赫達代替,即刻散散哋,先喺德超盃吞咗拜仁5蛋,再喺德盃首圈畀低組別球隊烏爾姆淘汰,認真羞家,頭2場聯賽只得1勝1負,喺世盃表現突出嘅克羅地亞國腳列比錫啱啱先好番未夠弗,禍不單行係後衞積祖威廉斯今場坐波監,真係攻不銳、守不穩。

兩軍嚟緊下周中都有歐洲賽任務,其中多蒙特要喺歐聯作客布魯日,為免有乜依郁增添傷兵,今場梗係想盡快解決法福;睇番佢哋近4次交手,「蜜蜂兵團」唔單止取得3勝1和,其中3次喺上半場取得領先,主勝賠率略嫌太熱,不如轉捧半場主勝。

赢家联盟