哥倫比亞 塞內加爾突圍有尖刀

2018-06-12 13:34:09 来源:互联网

H組4路大軍實力相差唔遠,當中哥倫比亞同塞內加爾都曾經打入過世盃8強。哥倫比亞擁有上屆世盃金靴得主占士洛迪古斯壓陣,而塞內加爾倚重效力利物浦嘅沙迪奧文尼,兩把尖刀蓄勢待發,希望幫球隊喺小組突圍而出。

鋒線猛料進攻至上

哥倫比亞曾經誕生過魔幻寫實派文學風格,國家隊踢法就進攻至上具觀賞性,尤其崇尚表現自我,上屆世盃哥倫比亞踢出隊史最佳成績殺入8強,當中「J神」占士洛迪古斯更以6個入球贏到金靴獎,今屆捲土重來嘅哥倫比亞力圖更進一步。

哥倫比亞上屆表現可人,球迷自然對佢哋有更高期望,不過睇番佢哋喺外圍賽表現,就較難畀到人信心,皆因佢哋喺外圍賽表現飄忽,既能作客喺南美群雄個個驚到震嘅玻利維亞高原主場擸晒3分,又試過喺最後衝刺階段連續4仗不勝,好在最後一輪穩奪出線權嘅巴西冇留力大炒智利,哥倫比亞同秘魯「默契」打和,先至「掹車邊」驚險進身決賽周。

法卡奧首戰世盃冇保留

哥倫比亞前線人腳唔曳,占士洛迪古斯今季轉戰德甲拜仁慕尼黑,經驗同狀態都處於高峰,將繼續擔起進攻重責。另外仲有哥國史上士哥王法卡奧,呢位32歲射手上屆決賽周前受傷無緣盛事,今屆首次為國家隊出征世盃,肯定毫無保留,配合快翼古達度,同兩位喺西甲效力嘅箭頭卡路士巴卡及路爾斯梅利爾,哥倫比亞鋒力稱得上有保證。

文尼再刮非洲風暴

塞內加爾2002年首次踢決賽周,當年出色表現畀球迷認識呢支非洲勁旅。闊別3屆後佢哋再有機會一嘗決賽周滋味,今屆陣容亦不容忽視,當中帶領利物浦打入歐聯決賽嘅前鋒沙迪奧文尼,擔起進攻大樑,希望再次刮起「非洲風暴」。

有料少帥執靚防線

塞內加爾喺2002年韓日世盃殺入8強,呢個亦係非洲球隊喺世盃嘅最佳成績,可惜光輝唔係永恒,塞內加爾之後3屆都未能喺外圍賽脫穎而出,直至今屆先強勢回歸。塞內加爾喺非洲區外圍賽7場不敗,其中5仗力保不失,球隊有此佳績,領隊艾路施斯功不可沒,呢位年僅42歲嘅少帥球員時代踢開後衞,深知想喺大賽踢出好成績,穩健防守最重要,喺佢執教下,塞內加爾嘅防守力得以顯著提升。

塞內加爾球員絕大部分喺歐洲搵食,最受矚目嘅自然係利物浦前鋒沙迪奧文尼,呢位速度同腳法兼備嘅射手,過去兩季表現出色,上季風頭雖不及隊友穆罕默德沙拿,不過佢喺前場飄忽嘅走位每每成為致勝關鍵,中場方面就倚重一班喺英格蘭搵食嘅「打仔」,塞內加爾絕對有力成一路奇兵。
 

论坛精华