英格蘭 巴拿馬 青春班鬥老坑

2018-06-11 11:52:52 来源:互联网

身處G組嘅英格蘭,雖被評為歷來最欠缺「星味」嘅英軍,但放下「名牌」包袱後換來更年輕陣容,令人期望;相反「新丁」巴拿馬就係今屆「最老」嘅球隊,到底係「拳怕少壯」定「薑愈老愈辣」,大家可以拭目以待。

三獅仔炮製新氣象

喺1966年以主辦國身份捧盃嘅英格蘭,多年來畀人一種「雷聲大、雨點小」嘅感覺。「三獅軍團」喺近5屆賽事當中,最佳成績亦只係殺入8強,上屆更喺分組賽出局,表現令人失望。

今屆英格蘭被視為近幾屆「星味」最淡薄嘅一次,除咗「雙特」林柏特同謝拉特掛靴、前鋒朗尼退役,連現役擁有最多喼帽門將赫特,亦因表現失準而名落孫山,取而代之加入迪利阿里、史達寧及拉舒福特等較年輕、相對經驗較淺嘅球員,相信喺外界期望較低之下,今屆注入青春、活力同速度嘅英格蘭,可有另一番新景象。

火力疲弱 要靠哈利仔食胡

英軍於外圍賽未嘗1敗,並以小組首名殺入決賽周,但係「三獅兵」期間只係射入18球,面對住刻意死守嘅球隊,往往會「老鼠拉龜」,如果佢哋想走得更遠,王牌射手哈利卡尼相信要加倍「生性」先得。況且,同組嘅巴拿馬、突尼西亞牌面上遠遜英軍,遇上英格蘭多數打守勢波,故此喺外圍賽採用4231或433陣式嘅領隊修夫基,亦開始試用「3後衞+2翼衞」嘅352陣式,以提升火力破密集,若發揮得宜,要突破8強亦非空想。

耆英陣容以守為攻

首度殺入決賽周嘅巴拿馬,毫無疑問係G組實力最弱、大賽經驗最淺嘅一隊。巴拿馬陣中球星欠奉,最具名氣反而係領隊靴蘭高美斯。呢位專教「弱隊」嘅領隊,自從2014年上任後,巴拿馬成績明顯穩步上揚,先喺2015年美洲金盃勇奪季軍,2年後喺中美洲國家盃更獲一席亞軍。喺世盃外圍賽最後一輪爆冷擊敗哥斯達黎加,壓過洪都拉斯同美國,以小組第3名歷史性進身世界盃決賽周。

外流兵做骨幹見慣大場面

巴拿馬係今屆平均年齡最大嘅參賽隊伍,雖然佢哋名不經傳,但當中大部分都喺南美洲聯賽同美職搵食嘅外流兵,見慣大場面,故此高度紀律同穩定性係最大殺着,從佢哋喺最後一圈10場外圍賽只能射入9球,但係同時僅失10球,結果球隊跟洪都拉斯同分,僅憑着較佳得失球換取決賽周入場券就可見一斑。另外,靴蘭高美斯今屆特別安排幾位落選23人名單嘅球員,以「嘉賓」身份隨隊,近距離為隊友打氣,對於「靠啖氣」以守為先嘅球隊嚟講,呢招絕對不容忽視!

论坛精华