南韓 墨西哥冇乜睇頭

2018-06-09 12:17:13 来源:互联网

南韓、墨西哥兩支均屬世盃常客,但各有問題;中北美洲勁旅墨西哥雖然於近幾屆世盃戰績平穩,但今屆卻面對老化問題,至於亞洲「太極虎」南韓則不進反退,世盃外已飽食驚風散,加上多番易帥內部立立亂,就算有弗爆oppa孫興民助陣,都唔幫得幾多。

頻易帥水準開倒車
南韓K-POP熱潮席捲全球,但足球偏卻開倒車,自2002年歷史性奪得世盃殿軍後,近3屆世盃兩度於分組賽「畢業」,「太極虎」過去4年先後委任洪明甫、史泰歷克及現時嘅申台龍3名主帥,佢哋戰術風格迥異,令球員難以適應。

南韓在世盃外12強賽被編入A組,當中只得伊朗實力較強,但「太極虎」表現差強人意,曾經不敵中國及卡塔爾,最終搵嚟申台龍接替史泰歷克,靠最後2輪悶和伊朗及烏茲別克,僅獲次名出線。查實南韓高層對呢位少帥唔多信任,上年11月聘請前西班牙助教格蘭迪,名為輔助申帥,實則係行雙領隊制,內部問題多多。

孫興民孤掌難鳴
雖然南韓王牌孫興民,今季喺熱刺弗到漏油,各項賽事入咗47粒,但佢身邊冇個幫到手,隊長奇誠庸效力嘅史雲斯降班收場,信心跌到落谷底,今季喺迪安轟入11粒嘅中場權昶勳,喺煞科戰重創搞到無緣世盃,加上中後場球員絕大部分來自韓、日及中超聯賽,防守甩甩漏漏,近7仗熱身賽僅得2勝2和3負,防線喺3後衞同4後衞之間轉嚟轉去,陣容搖擺不定,喺F組要面對德國、瑞典同墨西哥,實在難有運行。

老化保守前路難走
墨西哥連續7屆殺入世盃決賽周,隨着美國近年大幅退步,墨西哥在中北美洲可謂「無敵是最寂寞」,欠缺競爭性,前任「狂人」主帥米基爾靴里拉於3年前因打記者被炒魷,搵嚟奧蘇里奧接手,呢名領隊無論戰術風格及用人都非常保守,前年美洲盃曾慘吞智利7蛋,備受抨擊。

講到墨西哥最出名嘅球星,就梗係前曼聯射手查維亞靴南迪斯,不過「小豆」上季在韋斯咸長居後備,聯賽入得8粒咁大把,而上屆一戰成名嘅「墨國Sam哥」門將奧祖亞,近年從西甲踢到去比甲,發展未如人意;理應擔大旗嘅杜斯山度士及卡路士韋拿,正值盛年卻轉戰水準較低嘅美職,難免影響狀態。

後防仲靠39歲馬基斯
再望望今屆23人名單,有12人係年近或年逾30歲,除咗「小豆」、杜斯山度士及奧祖亞之外,曉高艾耶拉、隊長古亞達度等均屬正選,後備席上亦有34歲嘅奧運金牌英雄奧利比柏拉達,以及第5次征戰世盃、39歲嘅中堅馬基斯坐鎮,一個字──老。其餘當打嘅捷西斯加拿度、馬哥法比安未受重用,奧帥之倚重老將,導致活力欠奉,「仙人掌國」要連續8屆闖入世盃淘汰賽,絕非易事。

南韓帥料:申台龍(南韓˙46歲)
申台龍係城南一和功勳中場,掛靴後重返母會執教,率領城南勇奪亞冠盃及韓足盃,其後接手南韓U23於U23亞洲盃獲得亞軍,取得2016年奧運入場券,並喺1年後再升呢執掌水深火熱的南韓。

南韓世盃戰鬥史
今屆係南韓第10次出戰世盃決賽周,亦是連續9次取得世盃入場券,不計今屆,雖然有7次在分組賽出局,但在2002年作為東道主之一,「太極虎」在爭議聲中,借助球證偏幫下,連挫葡萄牙、意大利及西班牙3大勁旅,殺入4強,最終獲得殿軍,寫下亞洲球隊在世盃最佳成績。

墨西哥帥料:奧蘇里奧(墨西哥˙56歲)
由2001年起,奧蘇里奧喺曼城擔任助教4載,其後坐正執教多支中北美洲球隊,其中帶領國民體育會3奪哥倫比亞聯賽冠軍,並喺2015年接手墨西哥,但重守輕攻嘅風格為人詬病。

墨西哥世盃戰鬥史
連同今屆在內,墨西哥已經16次出席世盃決賽周,而且自1994年起,連續6屆殺入淘汰賽,可惜均於16強止步,包括上屆完場前反輸畀荷蘭。呢支中北美洲勁旅曾於1970及1986年兩度主辦世盃,2次均藉地利進身8強,亦係佢哋於世盃嘅最佳戰績。

论坛精华