德國 瑞典機動孖寶名牌剋星

2018-06-08 15:29:23 来源:互联网

世盃F組德國同瑞典堅持踢整體機動足球,都係名牌球隊剋星。記得德國上屆決賽周4強戰,7比1炒大熱門兼東道主巴西,震驚世界;瑞典今屆外圍賽嘅分組賽同附加賽,分別踢走兩支傳統勁旅荷蘭同意大利,隨時喺F組攜手出線。

整體之王強勢衞冕
德國挾外圍賽10戰全勝而臨,憑優異歷史戰績、超強穩定性同先進戰術理念,呢支世界排名第一勁旅喺俄羅斯力爭成為史上第二支蟬聯球隊(巴西曾於1958及1962連奪冠軍),已集有利條件於一身。

德國領隊勒夫自2006年世盃結束後正式帶領德國隊,但該屆喺德國主辦嘅世盃決賽周,佢以助教身份協助領隊奇連士文,事後「奇哥」都話比賽嘅戰術思想主要都係嚟自勒夫,結果德國喺自己地頭獲得季軍,之後兩屆世盃勒夫掌帥印後分別獲得季軍同冠軍,今次實際上係佢第4度領軍踢決賽周,講經驗絕對係無人能及。

超新星湧現更勝上屆
德軍今次保留咗包括湯馬士梅拿、卻奧斯等9名上屆冠軍功臣,再注入甘美治、迪姆華拿等超新星,加上近年多次不幸喺大賽前受傷嘅馬高列奧斯終於可以健康參戰,實力同兵源更勝去屆,既然上屆佢哋喺巴西地頭都可以大比數羞辱主隊,今次喺俄羅斯作賽地域上更有利,奪冠呼聲數一數二。

務實領隊倒米趕客
瑞典領隊贊尼安達臣,絕對係俄羅斯世盃組委會眼中釘,因為佢不斷同今屆決賽周趕客,先喺A組分組賽搶走粉絲多籮籮嘅荷蘭次名出線席位,去到附加賽仲將原本擁有保方、巴洛迪利同邦路斯等吸睛巨星嘅意大利踢埋出局,已經令到主辦單位同球迷相當冇癮。點知贊尼安達臣繼續唔理球迷感受,連瑞典最受球迷喜愛嘅「呂布」伊巴謙莫域傷愈後毛遂自薦想入隊,都唔領情置之不理,進一步削弱咗今屆決賽周嘅話題性同吸引力,呢位倒米領隊認真唔識做。

科斯貝治反擊核心
瑞典今屆人腳名氣平平,贊尼安達臣手中籌碼唔多,都婉拒伊巴謙莫域嘅好意,主因係伊巴歸隊好自然會成為全隊倚賴嘅核心,打亂咗整體戰部署,同時亦擔心佢頂唔住高強度嘅世盃激戰。不過,瑞典防線紀律同默契一流,穩守突擊戰術熟練,效力德甲萊比錫嘅大腦科斯貝治火速上位,呢位新星盤傳射都有上佳造詣,仲係死球專家,瑞典經常靠佢扭轉局面,遇上墨西哥絕有力一戰!
 

论坛精华