哥斯達黎加 瑞士小強打不死

2018-06-07 21:12:30 来源:互联网

世界盃有種球隊堪比「小強」,佢哋作風頑強,死纏爛打踢法每每令強隊束手無策,今日介紹嘅哥斯達黎加同瑞士就係呢類「小強」!由於E組有熱門巴西喺度,呢兩隊相信會以次名為目標,誓顯「不死生命力」!

巨人殺手炮製驚喜
哥斯達黎加喺4年前嘅巴西世盃擔演巨人殺手角色,分組賽力壓3支名牌烏拉圭、意大利同英格蘭,爆冷首名出線,16強再淘汰希臘殺入8強,最後同「橙衣軍團」荷蘭互射12碼僅負出局,其經歷足以寫成一個傳奇故事,呢隊中美洲小國名氣欠奉但勝在實際,隨時再為球迷帶來驚喜。

基羅拿華斯撐起防線
所謂弱旅出鋼門,要成為巨人殺手,首先就係唔失波,「金句王」黃興桂都講過:「一個好龍門能將輸變和,再由和變贏」哥斯達黎加就有位「神龍」在陣。基羅拿華斯上屆世盃上陣5仗,有3場保持清白,3度當選賽事最佳球員,更係「金手套」3大候選人之一,最後僅輸畀當屆冠軍德國鋼門紐亞,出色表現令佢獲皇家馬德里賞識。

鋼門同一條爛打防線令列強頭痕,哥斯達黎加突擊亦相當煞食,雙箭頭拜仁雷斯同祖爾甘保就係球隊數胡人物。32歲嘅隊長拜仁雷斯效力士砵亭,屬上屆世盃8強功臣之一,喺國家隊擔任進攻中場及影子前鋒,今屆外圍賽就為球隊攻入3球。

至於效力貝迪斯嘅祖爾甘保衝刺力強,25歲屬當打之年,今屆外圍賽大炒美國4比0一役,佢後備上陣即梅開二度,不過呢位射手今季曾受重創,養傷近3個多月,至今未回復最佳水平,主帥奧斯卡拉美利斯希望借近期熱身賽,催谷番起佢嘅狀態。

海外兵團力求突破
瑞士相信係今屆賽事世界排名最高嘅冷門,其世界排名高踞第6,外圍賽10戰9勝,但關鍵一戰失利而屈居葡萄牙之下,要靠附加賽壓倒北愛爾蘭亮相俄羅斯決賽周。瑞士近幾屆世盃四平八穩,但未能突破16強呢個「樽頸位」,今次點兵以外流球員為主,睇吓可唔可以打破宿命!

瑞士外圍賽被編入弱組,同組只得葡萄牙一支強隊,因此瑞士能取得9連勝,其實力處於一線尾、二線頭水平,不過穩陣踢法經常令對手叫苦連天,好似上屆16強面對南美勁旅阿根廷,瑞士力戰到加時完場前兩分鐘先失守,雖敗猶榮,兩年前嘅歐國盃分組賽亦能夠打和法國,可見瑞士戰鬥力唔曳。

格列沙加舉足輕動
瑞士今次23人大軍,有多達22人喺國外搵食,當中3位門將同時喺德甲獻技,後防就倚重剛剛由祖雲達斯轉投阿仙奴嘅列治史迪拿及AC米蘭鐵衞列卡度洛迪古斯,中場由阿仙奴嘅格列沙加擔大旗,呢位25歲中場日漸成熟,上屆世盃已獲徵召,並對法國一仗射入1球,兩年前歐國盃更踢足4場,今屆外圍賽射入7球,表現舉足輕重,雖然沙加近期受膝患困擾,好在證實趕得切決賽周前康復,可以為國披甲。

前線焦點球星要數到「矮腳虎」梳頓沙基利,26歲嘅佢今季為史篤城攻入8球,可惜球隊仍要降班,呢位綽號「阿爾卑斯山美斯」嘅箭頭,究竟係真材實料定係得啖笑,今屆將成佢證明自己嘅最佳舞台。
 

论坛精华