阿根廷尼日利亞冤家總是聚頭

2018-06-04 15:34:20 来源:互联网

有美斯坐鎮嘅上屆亞軍阿根廷係D組擂台躉,究竟球王今屆有冇機會打破大賽無冠宿命?同組仲有力求突破嘅「超霸鷹」尼日利亞。計埋今次,尼日利亞6次殺入決賽周,5次同阿根廷抽中同組,呢對冤家喺世盃確係好有緣。

無冕球王誓破宿命
計埋上屆世盃決賽,以及對上兩屆美洲盃,阿根廷近年已經連續3次喺大賽殺入決賽,不過佢哋3次都飲恨而回,阿國球迷同一班國腳肯定好失望,皆因佢哋已經有廿幾年無緣重要錦標,尤其對美斯呢位球王就更加似係畀上天作弄一樣。

美斯係阿根廷象徵,繼馬納當拿之後主宰國家隊,甚至世界球壇嘅旗幟性人物,美斯幫助巴塞隆拿贏盡所有球會級獎項,絕對配得起球王呢個朵。不過為國征戰多年都處於無冕狀態,而且多次於大賽決賽失利,都對呢位阿根廷核心造成重大打擊。2016年美洲盃決賽失利後,美斯仲曾一度憤然退出國家隊,雖然最終決定回歸,兼帶領球隊晉級2018世盃決賽周,不過由此可見美斯所要承受嘅壓力非常人可理解。

前場人才濟濟幫到手
當然除咗美斯之外,阿根廷前場人才濟濟,包括日漸成熟嘅保羅戴巴拿,經驗十足嘅射手阿古路同希古恩等都有入選,個個都身懷絕技。相比之下,阿根廷中後場星味就削好多,尤其擔正首席門將嘅韋利卡巴尼路,喺所屬球會車路士都唔係長期正選,狀態難有保證。無論如何,美斯都係無可或缺嘅重要人物,對已經30歲嘅美斯嚟講,今屆將會係佢當打之年嘅最後一屆世盃,相信為咗打破2哥宿命,佢絕對會喺世盃為球迷獻上最強表現,加上前線多咗好手幫忙,誓全力爭冠。

交足學費求創新高
除咗無緣2006德國世盃之外,尼日利亞近屆都成功晉級決賽周,但通常去到16強就繳械,未能更進一步。今屆捲土重來嘅超霸鷹,喺外圍賽表現強勢,兩輪夾埋8場波以不敗姿態搶得出線權,喺德國教頭盧亞帶領下,呢支年輕嘅球隊將會再次啓航。

尼日利亞絕對係非洲群雄之中,最為人熟悉嘅一支勁旅,前場攻擊線對關注英超嘅球迷嚟講絕唔陌生,包括域陀摩西斯、伊恩拿祖、阿密特穆沙甚至恩哈路,位位都有過英超揾食經驗,以佢哋幾位為首嘅進攻組合,絕對會成為撕破對方防線嘅利器。至於年僅22歲嘅伊禾比雖然係決賽周初哥,不過佢絕對會係尼日利亞今屆嘅焦點人物,呢位阿仙奴攻擊手喺今屆外圍賽,面對贊比亞關鍵一役射入制勝球,確保尼日利亞搶得決賽周席位,作為國家隊傳奇球星奧高查嘅姪仔,伊禾比將會繼承叔叔嘅衣缽,擔起「超霸鷹」嘅攻堅重任。

渴望突破16強樽頸
近年多次闖入決賽周嘅尼日利亞,上屆世盃雖然成功由分組賽脫穎而出,不過都未能突破94同98世盃嘅紀錄,最終0比2輸畀法國,再次止步16強。最近幾屆球隊喺分組賽階段就經常遇到阻滯,尤其要多次面對阿根廷呢個宿敵嘅挑戰,今年宿命依然冇放過呢對世盃冤家,再次將兩隊編喺同一組,不過相信「超霸鷹」多年嚟都同強敵過招,肯定交足學費,累積唔少經驗,相信有助球隊喺今屆取得突破。
 

论坛精华