丹麥澳洲命運天與地

2018-06-03 09:33:04 来源:互联网

C組丹麥同澳洲都要靠附加賽進身決賽周,但相對嚟講,丹麥近年有唔少冒起新星,如基斯甸艾歷臣同卡斯柏舒米高,難怪係首名出線次熱;相反,澳洲感覺上有啲青黃不接,球員喺亞洲就「蝦蝦霸霸」,弊在整體國際賽成績倒退,「袋鼠射手」卡希爾單天難保至尊。

猛人孭飛炮製驚喜
如果你仲講緊丹麥1992年點樣後補奪得歐國盃嘅童話,Sorry,真係唔想話你Out都唔得。雖然丹麥同世盃決賽周冇乜緣分,計埋今屆只係第5次出席決賽周,但今次征戰人腳具有相當實力,部分球員更係歐洲一線球隊正選,殺入淘汰賽甚至8強也絕不意外。

小舒米高有老竇咁堅
丹麥中後場都有獨當一面嘅球員孭飛,門將卡斯柏舒米高已證明完全遺傳父親舒米高嘅天分同技術,2015/16年李斯特城爆大冷贏得英超冠軍,卡斯柏舒米高居功至偉,事實上,丹麥喺外圍賽10場賽事只失8球,數字說明一切。當然,喺卡斯柏舒米高前面,仲有年輕嘅車路士中堅安達斯基斯坦臣,呢名22歲車仔青訓產品已坐穩車仔正選位置。

由於領隊夏利迪相對保守,熱刺中場基斯甸艾歷臣絕對係球隊轉守為攻嘅骨幹,基斯甸艾歷臣係今季歐洲聯賽其中一名炙手可熱嘅攻擊型中場,而佢亦有孭起球隊嘅能力同決心,附加賽次回合作客對愛爾蘭,佢上演帽子戲法助國家隊大勝5比1取得決賽周入場券,光芒四射。雖然老將賓特拿因傷可能缺戰,但相反有一班充滿幹勁嘅小伙子衝鋒陷陣,話唔定有意想不到嘅成績。

青黃不接逐級下跌
卡希爾絕對係近年澳洲最有卡士球員,呢名米禾爾前鋒喺外圍賽晉級之路共射入11球,而且之前3次世盃都有「士哥」,如果今屆喺俄羅斯又入波,就會連續4屆世盃決賽周士哥,同比利、高路斯及施拉齊名,認真巴閉。

38歲卡希爾單天難保至尊
不過,澳洲仍要依賴38歲嘅前鋒卡希爾,明顯係青黃不接嘅實證。雖然佢哋連續4屆殺入決賽周,但過程愈來愈艱難,2006年仍然係大洋洲會員國,最終同烏拉圭喺附加賽踢成1比1,射贏12碼殺入決賽周。2010年南非世盃「轉會」亞洲,外圍賽以不敗姿態直接出線,2014年巴西世盃只能以小組次名晉級,到今屆外圍賽,澳洲更加只得小組第3,要喺亞洲區先踢附加賽淘汰敍利亞,再擊敗中北美洲及加勒比海區代表洪都拉斯,先至搭上世盃尾班車。

澳洲決賽周成績亦愈來愈差,由2006年殺入16強,到2010年1勝1和1負以得失球差屈居同得4分嘅加納之下,小組第3未能出線,上屆更加3戰全敗,「袋鼠國」似乎同國際足球實力分野愈行愈遠,除非新一代如哈特斯菲爾德中場阿倫穆爾及昆士柏流浪中場盧安高有神來之筆,否則好大機會小組出局。

论坛精华