英西上盤累慣街坊

2018-06-02 09:44:10 来源:互联网

首輪分組賽冷味十足
足智彩嘅世盃首、次輪分組賽今日中午12時正式開售,《東方波經》當然第一時間幫大家搵好嘢,講到首輪分組賽重頭戲,一定係B組大戰葡萄牙對西班牙,以西班牙對上2屆世盃首戰嘅成績,呢場讓葡萄牙平半真係充滿暗湧,另外大眾熱門英格蘭喺G組首戰鬥非洲代表突尼西亞亦有冷味。

讓唔起葡萄牙突尼西亞
今屆世盃會喺香港時間6月14日晚揭幕,第2個賽日15號深夜已經有場超級大戰B組葡萄牙火併西班牙,睇番初步賠率,西班牙客W為1.82倍,讓球盤西班牙讓平半,賠率顯示都係睇高西班牙少少,但要留意西班牙對上2屆決賽周首輪分組賽都輸波,包括上屆以衞冕身份輸畀荷蘭1比5,就算對上一屆2010年喺南非成功捧盃,西班牙首輪分組賽都係輸畀瑞士0比1,慣性慢熱,今次面對有C朗拿度壓陣嘅葡萄牙更加要小心。

香港球迷最關心嘅英格蘭身處G組,首輪分組賽會喺6月18日深夜鬥突尼西亞,原來英格蘭近屆決賽周首輪分組賽成績亦唔算理想,對上4屆只攞到1勝2和1負,唯一一次贏波都係喺2006年小勝巴拉圭1比0,讓球盤英格蘭讓一球、球半咁重手唔算穩陣。

揭幕戰俄羅斯難大炒
至於揭幕戰東道主俄羅斯喺A組主場鬥沙特阿拉伯,俄羅斯今仗主W熱至1.3倍,讓球盤俄羅斯讓一球、球半,盤口相當辣,雖然對上3屆決賽周有2支東道主都能順利喺揭幕戰贏波,不過兩隊分別係德國同巴西,實力較差嘅南非喺2010年首仗就只能打和墨西哥,再加上沙特阿拉伯對上4次出席決賽周,除2002年一屆首仗以0比8慘敗畀德國之外,其餘3次都冇輸多過1球,想捧俄羅斯嘅球迷亦要諗清楚。

论坛精华