三獅怕傷盞畀鷹啄

2018-06-02 09:38:49 来源:互联网

領隊修夫基材料有限
世界盃仲有12日就殺埋身,呢段時間舉行唔少熱身賽,備受矚目嘅英格蘭就約戰咗「超霸鷹」尼日利亞,咪以為世界盃就開波各隊就會打真軍,大部分球隊都會以試陣練兵為主要目的,唔會吓吓同你去盡,如果球員有乜損傷真係喊都無謂,好似前幾日俄羅斯、日本都輸畀緣盡決賽周球隊,戰意有幾高大家有目共睹,奉勸大家都係揀讓球客勝。
(now 618及633台周日凌晨零時15分直播)

英格蘭外圍賽以不敗成績打入決賽周,將兩大外圍賽嘅不敗紀錄改寫至39場,話佢哋係外圍賽之王當之無愧,但樂比對英軍今屆前景完全冇信心,主要係英格蘭大賽心理質素太差,領隊修夫基亦畀唔到人任何信心,佢唯一戰績就係3年前帶領幼獅喺U21歐國盃決賽周分組賽包尾出局,同埋一手一腳將米杜士堡踢落英冠,最頂癮係佢為咗激勵球員士氣,畀番卜比笠臣紀錄片「More than a manager」班球員睇,大佬咩年代呀,睇勵志片都揀套吸引啲啦!

尼日利亞捧完2013年非洲國家盃後經歷咗低潮、15年同17年非國盃都喺外圍賽出局,佢哋喺兩年前聘請咗德國教頭羅亞,呢位喺非洲打滾多年嘅老帥廣獲好評,除咗帶領超霸鷹喺世盃外圍賽死亡之組出線,熱身賽更有擊敗阿根廷、波蘭等靚績,深得足總、球員及球迷支持。
超霸鷹尼日利亞返緊嚟
隊長約翰米基爾接受英國傳媒訪問時表示,尼日利亞向來係非洲足球強國,如果足總有心搞早已稱霸世界,奈何國家隊多年來受足總行政混亂、貪腐甚至出場費等問題影響,根本難以團結發揮正常水平,不過呢位德國教頭向來以紀律嚴明見稱,上任後向唔少老將開刀,寧願重用年輕球員,鐵腕管治令球隊戰績冒升。

現時尼日利亞有唔少優秀嘅年輕球員,例如前線兩把尖刀伊恩拿祖及伊禾比只係得21同22歲,但已經喺英超受到注目,當然唔少得小朋友至愛嘅李斯特城防中尼迪迪,配合有多年英超經驗嘅域陀摩西斯同約翰米基爾,尼日利亞中前場嘅配搭可謂相當完整,無可否認防線係佢哋最大憂慮,不過英格蘭近4場熱身賽都係入得一球,喺試陣嘅大前提下更加唔會CHUR到盡,絕對有機會畀尼日利亞偷到雞。

论坛精华