葡萄牙伊朗奎羅斯做主角

2018-06-01 15:43:26 来源:互联网

世界盃B組葡萄牙同伊朗,兩隊表面上毫無關係,但其實係一脈相承!事關伊朗領隊就係葡萄牙人奎羅斯,佢曾經兩度執教葡軍,兩隊今屆抽入同組,增添戲劇性色彩,但到底會係喜劇、悲劇、定係鬧劇呢?大家拭目以待。

C朗爭做「完美球王」
葡萄牙2年前以「半爆冷」姿態捧歐國盃冠軍,令巨星基斯坦奴朗拿度(C朗)球員生涯進一步「神化」,所以就算葡軍係一人球隊,只要C朗在陣,都足以化腐朽為神奇。呢位超級射手已經年屆33歲,好大機會最後一次出戰世盃,能否捧埋冠軍,進化「完美球王」就睇今鋪!

葡萄牙2016年歐國盃由分組賽殺入決賽,踢咗7場比賽,僅有1場喺法定時間90分鐘內贏波,但仍然成為最終贏家,可見要奪得大賽錦標,唔止靠實力,仲要有運。葡萄牙擁有「人生贏家」C朗,未踢已先贏運勢。呢位皇馬射手剛過去球季,表現經歷先低後高,下半季大爆發,重拾入球機器本色,剛好以巔峰狀態,迎戰決賽周,相信葡萄牙唔會重演「不勝晉級」嘅尷尬情況。事實上,葡萄牙今屆身處B組,真正對手只有西班牙,另外2隊伊朗及摩洛哥威脅有限,要出線並唔難。

貝拿度施華幫到手
睇番葡萄牙今次大軍名單,保留大部分歐國盃冠軍班底,最大改變係C朗好兄弟拿尼落選,取而代之係曼城中場貝拿度施華,呢位23歲新星今季英超有6球進帳,最重要係擁有優秀閱讀球賽能力,有佢負責組織攻勢,可分擔C朗壓力,隨時成為球隊新催化劑,為葡萄牙製造驚喜。

喪泊大巴偷雞搶分
亞洲代表伊朗之前4次出戰世界盃決賽周,全部分組賽出局,今屆能否取得突破,還看主帥奎羅斯。

奎羅斯最為人熟悉係擔任曼聯傳奇主帥費格遜嘅副手,喺費Sir身上學到唔少嘢,更因此獲皇馬委任為教練,教波資歷深厚。事實上,奎羅斯曾於1991至93年、2008至10年執教葡萄牙,見證葡國兩個黃金一代冒起,今屆帶領伊朗倒戈,奎羅斯百般滋味在心頭。

奎羅斯執教伊朗7年以來,最煞食武器一定係防守,當中喺世界盃亞洲區外圍賽第3圈,10場比賽僅失2球,成為12隊之中唯一不敗之師。由於伊朗係B組之中實力較弱嘅一隊,預料只能「泊大巴」,以抗衡西班牙及葡萄牙,希望守和有分落袋。

入波靠晒阿斯蒙
至於伊朗想贏波,好可能要靠對摩洛哥一戰,入波希望擺喺阿斯蒙身上,呢位23歲前鋒有「伊朗美斯」之稱,現時效力俄羅斯球隊魯賓卡山,喺今季俄超有6球進帳。

阿斯蒙同阿根廷美斯剛好相反,佢踢國際賽特別醒神,為伊朗上陣31場射入23球,排國家隊歷史射手榜第5位。另外,效力荷甲海倫芬前鋒高查尼赫特、英冠諾定咸森林中場迪查加,都有一定斤両,值得留意。
 

论坛精华