C朗衝冠皇馬經驗贏紅軍

2018-05-26 08:51:29 来源:互联网

基輔爆發巔峰決戰
歐聯王者最終爭奪戰,周日凌晨將會喺烏克蘭基輔爆發,連續2屆稱霸歐聯嘅皇家馬德里,硬撼闊別決賽多年嘅利物浦。利物浦雖然有穆罕默德沙拿擔旗,不過有基斯坦奴朗拿度(C朗)壓陣嘅皇馬,近年入得決賽都可以喺法定時間解決對手,經驗贏晒傷兵情況嚴重嘅「紅軍」,有力締造3連冠霸業,皇馬上盤唔好錯過。
(有線 622、604、602及603台周日凌晨2時45分直播)

11年來首度殺入歐聯決賽嘅利物浦,絕對稱得上係今屆嘅一支奇兵,尤其火力全開嘅強攻型打法,簡直係睇波球迷嘅福音。紅軍今屆自附加賽起計12仗狂轟46球,打破歷屆歐聯球隊單季最多入球數紀錄,不過輝煌嘅入球數紀錄,背後掩蓋咗嘅係球隊防線不穩嘅事實,紅軍今季歐聯至今失過16球,其中4強次回合就試過作客以2比4輸畀羅馬,後防漏洞表露無遺。而且搏殺咗成季嘅利物浦嚟到季尾,可以話係傷兵滿營,後衞祖爾麥迪比、祖高美斯同中場阿歷士張伯倫提早收咧,德國悍將安利簡恩又受背傷困擾,中場得番占士米拿、佐敦軒達臣、韋拿杜姆同拉爾拉拿可用,4人都係明顯攻強守弱嘅中場,點可以幫到原本已經不穩嘅防線呢?

施丹棄本土賽孤注一擲
已經連續2屆捧起歐聯獎盃嘅皇馬,教練施丹今屆放棄本土戰線,孤注一擲全力爭取歐聯3連霸,佢哋嘅王牌射手C朗今屆已經累積15個士哥,位列歐聯射手榜榜首,仲領先對面「紅軍」埃及入球機器沙拿5球,睇得出呢位葡萄牙球星想攞冠軍嘅決心。而且「銀河艦隊」近6次闖入決賽全部捧盃之餘,其中4次喺法定時間已經擊敗對手,堪稱歐聯專家,面對等咗咁多年嚟先有機會行近歐洲之巔嘅「紅軍」,皇馬經驗肯定更值信賴,呢場捧皇馬上盤。

论坛精华