羅馬「奇迹護體」祖記有難

2018-05-13 10:26:16 来源:互联网

衝歐聯搵錢戰意勝一籌
今輪意甲最矚目之戰,一定係羅馬主場對祖雲達斯,兩隊各有所求,羅馬贏波就可以穩佔前4位,有得踢下屆歐聯,祖記只需攞1分,就夠捧盃。所以講爭勝戰意,羅馬勝一籌,最重要係呢支首都勁旅「羅馬奇迹」威力驚人,專破豪門,主W博得過。
(無綫myTV SUPER 302周一凌晨2時45分直播)

意甲只剩下2輪比賽,羅馬領先第5位國際米蘭4分,換言之今場只要全取3分,就一定攞到下屆歐聯入場券。羅馬今屆歐聯打入4強,收入近1億歐元(約9.3億港元),大大提升球會財力,食過翻尋味,幾大都要再次爭取踢呢項「搵錢盃」,今場對羅馬而言,極之重要,肯定搏老命。

雖然羅馬整體實力唔及祖記,但勝在踢大戰有「羅馬奇迹」護體,佢哋今屆歐聯主場曾先後大勝車路士及巴塞隆拿3比0,贏利物浦4比2,今場重頭戲隨時又嚟料,贏埋祖雲達斯。事實上,羅馬近2次主場鬥祖記,都成功贏波,值得追捧。

祖記捧完意盃未high完
至於祖雲達斯領先次席拿玻里6分,同對方對賽成績一樣,祖記只需餘下2仗聯賽取得1分,已經足以捧盃,如果拿玻里失分,祖記更加可自動奪冠,所以根本毋須急於求勝。同埋祖雲達斯剛於上周中奪得意大利盃冠軍,球員可能仲沉醉勝利之中,鬥心難免打折扣。更何況祖記最後1輪主場對手,只係篤定降班嘅維羅納,到時喺自己地頭贏波捧盃都未遲。

论坛精华