金錢堆砌冠軍 欠歸屬感

2018-02-10 10:41:03 来源:互联网

雖然依家只係2月,但歐洲幾大聯賽如英超、西甲、德甲及法甲冠軍,基本上已成曼城、巴塞隆拿、拜仁慕尼黑及巴黎聖日耳門嘅囊中物,因為呢幾隊喺聯賽已放到甩轆,只剩下意甲由祖雲達斯同拿玻里爭崩頭。所以現階段領放嗰幾隊有大把失分空間,好似曼城喺上輪聯賽作客被般尼逼和1比1,既然周末有咁多比賽,博彩方面無謂刻意去揀呢啲失分都冇問題嘅球隊。

講番英超,堂堂上季冠軍之師嘅領隊,干地因車路士近期戰績不佳而帥位不穩,就算畀佢捱到季尾,最終都好大機會不歡而散,重演莫連奴喺奪冠後翌季被炒嘅噩夢。當今足球以金錢掛帥,由有錢班主一擲千金,招攬頂級領隊及球員,用金錢堆砌出冠軍。上述營運模式,欠缺昔日嗰種有大家庭感覺嘅歸屬感,再冇好似馬甸尼般「一生一球隊」嘅典範,球員可為錢轉會死敵,富豪班主只看戰績,稍有閃失便怒炒領隊。對於教頭嚟講,最缺少嘅係時間,以往有耐性地提拔自家青訓產品,再簽入幾名具質素強援,藉此重建球隊嘅健康日子不復再。

英超冇歇冬期玩謝高普
英超競爭之激烈,非其他聯賽可比,亦因耗力甚巨缺少休息,導致佢哋近年喺歐洲賽戰績不佳,有見及此,近日再傳出待現有電視轉播合約完結後,英超會引入歇冬期。到底歇冬有幾重要?利物浦主帥高普之前執教德甲球隊多蒙特,帶領呢支沒落豪門連奪聯賽及殺入歐聯決賽,當佢轉戰英超後,照舊將「蜜蜂兵團」嗰套逼搶打法引入紅軍,但未如理想。一來英超水準更高,二來強調快速及高強度嘅身體對抗,令高普過於體力化嘅瘋搶戰術很難長時間保持,表現忽龍忽蟲,既可勇挫「1哥」曼城,卻不敵一度包尾嘅史雲斯,如果畀佢哋有個歇冬期抖抖,情況應該好啲,大家留意,今季德甲歇冬期長達22日,有得抖吓差好遠。

论坛精华