越南U23衝冠玩大佢

2018-01-27 13:54:39 来源:互联网

決賽撼烏茲別克唔會縮

U23亞洲盃嚟到尾聲,周六下午決賽戲碼將會有越南U23硬撼烏茲別克U23。賽前不被睇好嘅越南U23堪稱係今屆賽事嘅奇兵,表現強勁,而且佢哋面對強敵絕對唔會死守,尤其嚟到一戰定生死嘅決賽,球員肯定會放手一搏,加上對手烏茲別克U23攻力亦有番咁上下,呢場勢上演對攻戰,中位數2.5球入球大有得諗。

(Now 671及Fox Sports Play周六下午4時直播)

越南U23今屆球員個人實力以至於球隊整體戰術都令人眼前一亮,今屆多次炮製爆冷戰果,包括1比0擊敗傳統強隊澳洲,過去兩仗面對強敵伊拉克同卡塔爾,都同對手形成對攻局面,一改過往球迷對東亞球隊實力欠奉嘅固有印象,尤其一對前場進攻組合狀態神勇,除咗有「越南美斯」之稱嘅阮公鳳之外,多次為球隊取得關鍵入球,至今斬獲4球嘅阮光海表現更加搶鏡,呢場入波冇難度。

況且越南總理阮春福尋日宣布,成隊U23球員連教練、後勤人員31人,將獲頒集體一級勞動獎章,門將裴進勇、射手阮光海以及韓籍教頭朴恒緒更單獨獲得三級勞動獎章,全隊士氣高昂。

烏茲別克火力強橫
烏茲別克球員個人能力不嬲犀利,呢屆U23曾以4比0擊敗衞冕嘅日本U23,進攻意欲強勁,呢場入球睇嚟都唔會少,中位數2.5球入球大捧得過。
 

论坛精华