墨城主場炸機最拿手

2018-01-25 17:24:55 来源:互联网

澳職呢個禮拜戲碼幾吸引,前列球隊將會正面對撼,打頭陣係今日墨爾本城主場迎戰紐卡素噴射機;現時積分榜,兩隊只係相差4分,排第3嘅墨城梗想藉住今日主場優勢全取3分,進一步追貼第二位噴射機,同埋保持後上取代對方常規賽亞軍嘅希望啦!由於噴射機近期狀態較飄忽,今日呢場大戰墨爾本城讓平半,我一定博上盤。

(有線64及203台周四下午4時50分直播)

墨爾本城總算走出之前低谷,近4場攞到3勝1和佳績,上場仲喺主場大炒阿德萊德聯5球,證明火力同信心完全返晒嚟!佢哋向來都係地頭蟲,今季9次主場有5勝1和3負,主場成績排澳職第3,都算係幾好喇!今日仲有右翼布魯士卡馬奧、新加盟嘅高大後防迪爾布歷治復出,更係如虎添翼,攻守人腳較為完整;睇番墨城近2次主場對噴射機,都係由佢哋贏出,今日始終會秤先啲,有信心呢3分攞硬!

噴射機作客場場失波

至於作客嘅紐卡素噴射機,上仗主場竟然輸畀弱旅威靈頓鳳凰,真係令人費解!佢哋作客比賽嘅防守數據真係嚇死人,今季7場作客「每場必失」,一共失咗10球!穿窿防守面對住人哋主隊嘅強勁攻力,睇嚟都係凶多吉少。今日賽前仲傳出後防主力艾雲胡積卡可能要帶傷上陣,條防線就更加雪上加霜。噴射機今季作客始終有啲患得患失,若果弊病唔能夠徹底解決,現時啲早飛又唔多支持,都係危危哋嘞!

论坛精华