阿仙奴車仔捱慣細界

2018-01-03 11:22:10 来源:互联网

阿仙奴車仔捱慣細界

倫敦打吡唔興駁火
英超快車賽期最後一輪焦點大戰,周四凌晨阿仙奴將會主場重錘出擊,同車路士上演倫敦打吡。阿仙奴今季面對Big 6強隊頻頻失分,呢場面對「3哥」車路士,兵工廠肯定唔敢貿然進攻,加上客軍車仔射手艾華路莫拉達近7仗入得2球狀態有所下滑,後備前鋒巴舒亞伊又唔爭氣,攻力難有保證。阿仙奴聯賽主場近5次面對車路士有4次開2球或以下,呢場再次喺酋長球場碰頭場面料同樣膠着,加上快車檔期大家都搏到殘,博有2.15倍嘅中位數2.5球入球細好過。

(Now 621及Le Sports周四凌晨3時45分直播)

兵工廠高層今季開咧前誓言劍指英超冠軍寶座,不過球季踢到接近一半,僅以38分排喺聯賽第5,仲要踢多緊隨其後嘅熱刺1場,唔好話歐聯,隨時連歐霸資格都難保,歷盡磨練嘅廠迷咁現實,又點會輕信呢啲季前豪言,加上季尾合約就到期嘅兩位進攻核心阿歷斯山齊士同奧斯爾遲遲唔肯續約,嚟緊有可能齊齊走人,搞到球隊上下囉囉攣,直接影響球隊進攻效率,呢場前鋒基奧特仲養緊傷,面對強敵車路士,阿仙奴前場難有作為。

首循環對賽互無紀錄
英超積分榜排第3嘅車仔,依然畀板櫈深度不足嘅問題困擾,前鋒人腳尤其短缺,由於巴舒亞伊表現欠佳未能擔起重任,箭頭位置暫時只有艾華路莫拉達一人可以踢到,呢位西班牙前鋒第一季加盟英超表現抵讚,不過狀態難免會有高低,特別當佢畀人嘜實嗰陣,球隊進攻大打折扣,加上車仔近期作客成績飄忽,近4次客戰入得4球,呢場面對同市勁敵,有可能重演首循環嘅0比0戰果,中位數2.5球入球細博得過。

论坛精华