曼城拆紐冇手軟

2017-12-27 15:15:26 来源:互联网

曼城拆紐冇手軟
 
衝連勝紀錄 「-2」照捧
周四凌晨「英超快車」上演獨腳戲,勢如破竹嘅「一哥」曼城作客紐卡素。曼城上半季以無敵姿態豪取18勝1和成績,包括目前連續17場聯賽連勝,主帥哥迪奧拿要打破自己執教拜仁慕尼黑嗰陣所創嘅19連勝紀錄,梗係唔會輕易收油,殺得性起嘅曼城好大機會繼續大炒,捧「-2」讓客咪拗頸!

(Now 621及Le Sports周四凌晨3時45分直播)

曼城自從第2輪和波後,之後17場聯賽贏晒,哥迪奧拿最厲害嘅地方,係佢能夠長期令球員保持高昂戰意,並冇因為聯賽領先優勢大就放軟手腳,相反係愈贏得多愈有信心,近3仗聯賽分別炒史雲斯4球、炒熱刺4比1以及4蛋贈般尼茅夫,繼續大勝係好正路嘅發展。

單計2017年,「藍月亮」喺聯賽攻入101球,同利物浦喺1982年所創嘅英國頂級聯賽年度入球紀錄(106球),只係相差5球,曼城今年仲有2場聯賽,要破紀錄絕對唔難,隨時今場波已經可以做到添!阿古路同加比爾捷西斯今季輪流上陣,令佢哋喺密集賽程中保持超高水準,無論邊個落場都可以大殺四方。

紐卡素缺兩大中場更難頂
另邊廂,紐卡素雖然上仗勇挫韋斯咸3比2,但近10仗僅獲1勝1和8負兼失21球嘅劣績,而且2名中場艾錫希頓同米基爾馬連奴都受傷,弱不禁風嘅「喜鵲」防線更加頓失掩護,今仗好大機會畀曼城狂數,曼城「讓球主客和」讓兩球濕濕碎,照捧2.48倍嘅讓球客勝。
 

论坛精华