大Sam朗尼攜手煞車

2017-12-23 20:28:50 来源:互联网

愛華頓易帥脫胎換骨
今晚英超上演聖誕新年快車首輪檔期,頭場有車路士作客愛華頓嘅「雙藍大戰」,愛華頓自「大Sam」上任後脫胎換骨,執教5場不敗,沉寂多時嘅朗尼更得到重生,「拖肥糖」今場有力繼續締造奇迹,主場受讓半一,樂比建議捧下盤。

(Now 621及LeSports周六晚8時30分直播)

「大Sam」威力始於11月尾對韋斯咸,當時球會剛宣布佢上任,「大Sam」只係坐喺觀眾席上,據講只係畀咗幾個「錦囊」班球員,但就成功大破對手4比0,士氣大振,之後艾拿戴斯執教嘅5場比賽都順風順水,取得4勝1和佳績,咁多場之中最難踢當然係默西塞德郡打吡大戰,逼和利物浦1比1,但其實上場對史雲斯落後1球下反勝3粒,表現都相當出色,成隊波無論士氣同狀態都明顯處於高峰。

收起米高堅尼正確選擇
究竟「大Sam」嚟咗愛華頓之後有咩魔法?首先係執過條防線,愛華頓季初嘅防守可用慘不忍睹嚟形容,但近6場卻能夠有4場保持清白之身,功勞最大嘅就係今季高價買番嚟嘅米高堅尼,因為佢喺大Sam上任後已淪為後備,而呢個絕對係正確嘅選擇。

另外一個改變就係踢法直接咗好多,艾拿戴斯否認自己係傳統英式足球擁護者,不過佢就話愛華頓以往進攻太過迂迴,下下橫傳或後傳唔掂,所以佢加盟後球隊效率明顯好咗,而「進攻鐵三角」卡維特利雲、朗尼同基菲爾施古臣嘅互動亦明顯增加,係導致朗尼近期大爆發嘅主要原因,朗尼近5次上陣入咗6球,絕對係車仔今場嘅心腹大患。

車仔近5訪葛迪遜公園3敗
睇番車路士早前爆冷不敵韋斯咸0比1後成功3連勝,但對手狀態同實力平平,今場絕對難啃好多,可惜周中聯賽盃射入關鍵球嘅艾華路莫拉達慶祝入波時領黃牌,今場要停賽,車仔進攻上又少咗個選擇,其實車仔近年作客葛迪遜公園球場都吃過唔少苦頭,近5次到訪就輸過3次,快車期開始絕對有冷味!
 

论坛精华