祖記強勢搶W

2017-12-23 20:27:16 来源:互联网

近7次主場橫掃羅馬
意甲重頭戲,祖雲達斯主場迎戰羅馬,雙方於周中意盃命運各異,祖記晉級但羅馬出局,唯一相同係兩隊都派副選出擊,明顯留力今場大戰。講到全力出擊,祖雲達斯始終秤先,特別係佢哋近7次主場全勝羅馬,戰績靚爆鏡,1.78倍主W值得再追。

(myTV SUPER 302周日凌晨3時45分直播)

祖雲達斯門將保方及前鋒文迪蘇傑有傷,今仗好大機會缺陣,不過呢支意甲6連冠勁旅勝在整體人腳質素佳,即使保方近4仗都養傷,但2號門將施捷斯尼交足功課,保持不失球。至於文迪蘇傑因為小腿受傷,縫咗13針因此難以披甲,但唔好忘記陣中仲有保羅戴巴拿,呢位阿根廷國腳近期被貶為後備,但上仗意盃獲得擔正機會即大顯身價,射入1球並交出1次助攻,幫祖記贏熱拿亞2比0,擺明要以行動說服教練阿里基畀番佢做正選。

除咗兩位「後備兵」有火,祖記另一大優勢係近7次主場對羅馬,結果全部贏晒,當中5次冇失波之餘,更有4次大勝3球或以上,明顯剋住羅馬,呢條「黃金好路」值得再追。

遇強即屈凶多吉少
另一邊廂,羅馬雖然今季聯賽作客仍然不敗,但要留意近兩場作客都贏唔到,而且對手分別係兩支下游球隊熱拿亞、基爾禾。值得一提,羅馬遇強即屈,今季聯賽兩場敗仗,就係主場輸畀排前列嘅拿玻里同國際米蘭,今次去到「凶地」都靈比賽,硬撼第3位嘅祖記,恐怕難逃再敗。
 

论坛精华