愛華頓劏鵝冇手軟

2017-12-18 23:02:50 来源:互联网

大Sam領軍全面復甦

今季開咧成績不似預期嘅愛華頓,喺周二凌晨上演嘅英超獨腳戲主場迎戰史雲斯。「拖肥」自「大Sam」艾拿戴斯接手後,表現全面復甦,連帶當家球星朗尼都弗番,今仗仲有恩歷克波拿斯復出,面對近5仗客戰全部輸晒嘅「天鵝」史雲斯,1.63倍主W必捧。

(Now 621及Le Sports周二凌晨4時直播)

「拖肥」季初喺朗奴高文帶領下,成績差到暈,更淪落到喺降班區掙扎,其後改聘老牌教頭艾拿戴斯救亡,然而最樂觀嘅「愛粉」都估唔到,喺「大Sam」帶領下球隊可以咁快重回正軌,近4場3勝1和兼殺上聯賽榜「前半版」,其中和波嗰場仲要係同利物浦合演嘅默西賽德郡打吡,令人眼前一亮。

愛華頓近期另一令人驚喜嘅,就係「月巴」朗尼。呢位32歲前鋒近2仗分別喺利物浦同紐卡素身上取得士哥,暫時累積9粒入波成為球隊首席射手,仲攞埋英超11月嘅最佳入球獎添!今仗朗尼續與卡維特利雲合作攻堅,加上養傷多時嘅中場恩歷克波拿斯有望復出,人腳更見完整。

史雲斯近5作客全敗

另邊廂嘅史雲斯今季賣走洛蘭迪同基菲爾施古臣後,成班波明顯唔夠打,以致聯賽排名同入球數都喺英超包尾,尤其施古臣仲轉投埋呢場對手愛華頓,此消彼長下更加輸蝕,加上「天鵝」客戰成績勁曳,近5仗全敗,面對氣勢返晒嚟嘅「拖肥」,甚難有作為,1.63倍主勝有買趁早。
 

论坛精华