般尼茅夫大盤牟利

2017-12-17 15:14:55 来源:互联网

今晚英超尾場,由般尼茅夫主場對利物浦,「紅軍」利物浦經常畀人話係「海鮮波」,水準飄忽難以捉摸,利迷睇波往往要食定「救心丸」,尤其以作客「心跳指數」最爆燈。睇番利物浦今季8場聯賽作客,有7場總入球係3球或以上,其中6場更達5球或以上,名副其實係有前冇後,中位數2.5球入球大有1.5倍夠穩陣。

(Now 621及LeSports周一凌晨零時30分直播)

紅軍作客零舍開放

利物浦夠晒反傳統,聯賽主場踢悶蛋足球,9戰只入得14球,搞到和咗5場;相反「紅軍」作客踢得非常開放,8戰入20球、失17球,包括打和屈福特3比3、吞曼城5蛋、大炒白禮頓5比1等6場大比數賽果。上月歐聯作客西維爾,上半場領先3球,竟然被逼和3比3,都夠晒經典,總之「紅軍」作客肯定冇悶場。利物浦經過連續兩場主場和波失分後,今仗作客隨時又嚟料,為球迷製造「驚喜」。

主隊般尼茅夫今季演出麻麻,但以往鬥利物浦常有超水準表現,包括上季主場落後1比3下,反勝「紅軍」4比3,作客亦和過2比2,有晒往績支持球員再硬撼利物浦,信心都高啲,唔怕同對手駁火。
 

论坛精华