西布朗細守紅魔

2017-12-17 15:14:03 来源:互联网

柏杜掌舵後防穩咗

今晚英超頭場由曼聯作客對西布朗。曼聯早前打吡輸畀曼城後,想爭冠軍再冇失分空間,今場面對聯賽下游嘅西布朗,「紅魔」牌面上勝算較高,但想大炒未必咁易,皆因西布朗自領隊柏杜上任後防守大有改善,加上兩隊近5次交手全開2球或以下,今場入波唔慌會多,中位數2.5球嘅1.72倍細盤好路。

(Now 621及LeSports周日晚10時15分直播)

曼聯領隊莫連奴戰術部署保守係人都知,今季已經多次被人詬病下,「寸王」依然我行我素,好似前仗至關重要喺「曼市打吡」主場都泊大巴,結果都係阻唔到曼城贏波,曼聯痛失重要3分兼進一步畀「藍月亮」拋離。「寸王」份人心高氣傲,任外人點講,佢都唔會改變保守嘅風格。曼聯今仗想入波難度唔細,前鋒盧卡古雖然喺上仗贏般尼茅夫有波入,但自10月以嚟佢都只係為曼聯喺聯賽攻入兩球咁大把,加上中場靈魂保羅普巴繼續停賽,缺乏輸送下一班前鋒都幾難搵食。

西布朗近3仗只失1粒

西布朗由柏杜接手後,防守明顯有進步,近3仗只失1球,最叻係上仗作客守和「好攻得」嘅利物浦,不過西布朗鋒力相當疲弱,柏杜上任後球隊仲未入過波,入球數更喺英超墊底,今場縱使有老將巴利同馬菲菲臘斯復出,面對牌面高啲嘅曼聯,西布朗都係乖乖囤重兵喺後防,先求唔失波再伺機突擊,中位數2.5球細盤夠吸引。
 

论坛精华