利物浦斯巴達大晒冷

2017-12-06 12:51:48 来源:互联网

生死鬥對攻唔會縮

今晚歐聯尾輪E組關鍵戰, 利物浦主場硬撼莫斯科斯巴達。利物浦上輪大意失分,如果今仗有乜依郁輸波,隨時會出局添,不過「紅軍」唔識得守,坐擁弗爆三叉戟穆罕默德沙拿、羅拔圖法明奴及菲臘比古天奴,面對非勝不可嘅斯巴達勢必係鬥攻格,中位數3.5球入球大不容錯過。

(有線61及201台周四凌晨3時45分直播)

利物浦上輪作客領先3球,大好形勢之下,竟然畀西維爾逼和3比3,雖然依家仍以9分位列E組「1哥」,但僅領先西維爾及莫斯科斯巴達1分及3分,原則上今仗只要和波即出線。不過,如果紅軍今晚不敵斯巴達,而西維爾擊敗馬里博爾的話,首名資格就會讓畀西維爾,「紅軍」則畀斯巴達追至同分,因對賽成績較差(1和1負)跌落第3,無緣晉級;就算西維爾同馬里博爾和波,出現3隊同得9分情況,但利物浦與這2隊對賽僅得3分(斯巴達有7分,西維爾有5分),一樣要同歐聯講bye-bye,所以利物浦不能大意。

但利物浦主帥高普不擅調教防守,無論用洛夫雲、卡拉雲或祖爾麥迪比鎮守中路都唔穩陣,而左閘艾拔圖摩蘭奴更係計時炸彈隨時爆,與其整頓防線,高普寧願主動出擊爭勝,尤其係前線三叉戟穆罕默德沙拿、羅拔圖法明奴及菲臘比古天奴弗到漏油,單係沙拿,喺今季各項賽事已有17個士哥,仲當選11月英超最佳球員,而且「紅軍」喺歐聯例必搶攻,近7仗歐聯狂轟22球,其中4仗開4球或以上。

高普領軍不擅防守

另邊廂,莫斯科斯巴達為爭出線非勝不可,本身佢哋踢法有前無後,單計今季13場作客正式賽事,無論賽果係點,都只有2場無波入,故此即使遠赴利物浦市,一樣唔會坐以待斃,鬥攻格局隨時演入球騷,3.5球嘅大盤有計。
 

论坛精华