8大勁旅熱身好戲連場

2017-11-14 17:38:23 来源:互联网

今晚除咗上演世盃外歐洲區最後一場附加賽次回合,8支有份參戰明年決賽周嘅球隊亦會喺熱身賽互相對撼,戲碼相當不俗。

俄羅斯細頂西班牙

決賽周主辦國俄羅斯上仗熱身賽對阿根廷力戰至完場前4分鐘,才被阿古路一箭定江山,表現雖敗不辱;西班牙上仗於主場5比0大勝哥斯達黎加,不過皇馬中場艾斯高受傷退下火線,今仗肯定缺陣,而且嚟緊周末西甲將會上演馬德里市打吡,相信一眾狂牛兵都會避重就輕,入波應該唔會多,捧2.5球細盤好路。

(now 632周三凌晨2時45分直播)

法國拍跳專剋德國

世盃盟主德國視衞冕為首要目標,近年對待熱身賽態度欠積極,例如上仗面對陣容不整嘅英格蘭都只能打和0比0,試陣心態昭然若揭。法國上仗主場憑基沙文、基奧特各建一功,輕鬆以2比0擊敗無緣決賽周嘅威爾斯,壞消息係入波功臣基奧特受傷已退隊,好彩基利安麥巴比、費基亞同拿卡錫迪都有級數,加上法國近3次友賽對德國錄得全勝佳績,受讓相當抵玩。

(無綫翡翠台及myTV SUPER 94台周三凌晨3時45分直播)

比利時日本做大騷

比利時前線星光熠熠,盧卡古、夏薩特及奇雲迪布尼全部獨當一面,可惜防線除維頓漢之外,其餘華美倫、蒙尼亞或保耶達唔係缺態便是過於輕出,表現畀唔到人信心,上仗熱身賽3比3打和墨西哥,充分反映球隊攻強守弱。日本上仗喺中立場法國以1比3大敗畀巴西,實力和一級勁旅有明顯距離,加上兩軍近3次交手全開4球或以上,今仗捧2.5球大盤啱數。

(有線64及203台周三凌晨3時45分直播)

英軍殘陣難抗巴西

英格蘭繼哈利卡尼、哈利雲克斯、迪利阿里、佐敦軒達臣、史達寧及戴爾夫退隊後,門將畢蘭特同中堅菲爾鐘斯亦都受傷,領隊修夫基由U21提拔蘇蘭基、路易斯曲克及安格斯根恩上一隊,無論經驗及卡士都唔夠班。相反,巴西續有王牌尼馬、菲臘比古天奴、加比爾捷西斯等壓陣,加上佢哋近26仗熱身賽豪取25勝,僅曾不敵阿根廷,造訪殘陣「三獅兵團」可反客為主,客勝必捧。

(now 633周三凌晨4時直播)
 

论坛精华