歐聯決賽雙雄分途搵食

2017-05-17 06:12:32 来源:互联网

 歐聯決賽雙雄分途搵食

 
歐聯決賽雙雄皇家馬德里及祖雲達斯下月3日深夜交鋒前,今晚各自分途出擊,搶奪本土錦標催谷聲勢!皇馬於西甲補賽作客切爾達,贏波就可反超前榜首巴塞隆拿3分,為奪取近5年首個聯賽冠軍奠定基礎;至於祖雲達斯出戰意大利盃決賽火併拉素,衝擊「三冠王」頭關,絕對唔可以甩拖!雙雄係咪可以順利贏波造勢,真係拭目以待。
 
搶冠關鍵戰先發制人 皇馬半場大起切爾達
今晚西甲補賽上演爭冠關鍵戰,由「2哥」皇家馬德里作客切爾達。「銀河艦隊」依家同死敵巴塞隆拿同分,但就踢少1場,只要今晚贏波就可壓過巴塞重返榜首,到時掌握番主動權,預計一開波會如狼似虎搶攻,希望盡快入番幾粒鎖定勝局,客W太熱冇肉食,捧中位數1.5球嘅1.62倍半場大好過。
 
(Now 632周四凌晨3時直播)
 
皇馬打少1場下與巴塞同樣得87分,但對賽成績輸蝕畀對手(1和1負),只有積分上多過巴塞先可贏聯賽冠軍,皇馬僅餘今晚補賽對切爾達同煞科戰作客馬拉加,因此今仗贏唔贏到對佢哋爭標非常關鍵。儘管「銀河艦隊」要兼顧埋歐聯條戰線,好彩佢哋兵源充足,其中艾華路莫拉達及占士洛迪古斯等非主力球員,喺賽程頻密之下發揮關鍵作用,每次落場都搏到盡,令皇馬雙線作戰都Keep住咁醒。
 
施丹客戰玩速食
皇馬主帥施丹往往於作客比賽採取先發制人策略,務求盡快打破僵局,之後踢番最擅長嘅快速反擊,呢個策略非常成功,皇馬喺聯賽作客已7連勝,近6仗就有5次於半場領先,當中有5仗上半場總入球至少有2粒,預計今晚都會採取速戰速決嘅戰術。
 
切爾達近8仗聯賽只得1勝7負,上周中喺歐霸盃4強又畀曼聯踢出局,士氣唔慌好,相信擋唔住皇馬喪攻。不過今仗皇馬客W得1.11倍,讓球盤要讓到2/2.5球咁辣,半場客勝都只得1.43倍咁乏味,既然皇馬鍾意比賽初段搶韁,相信上半場會有唔少入波,不妨捧有1.62倍嘅1.5球半場大。
 
法達斯維
 
意盃爭霸決戰拉素 祖記三冠頭關造細
祖雲達斯連續3屆打入意大利盃決賽,過去兩屆都成功捧盃,簡直當正羅馬奧林匹高球場係自己地頭一樣。不過要留意祖雲達斯之前兩屆都要踢到加時先至捧盃而回,而且主力射手文迪蘇傑有傷,進攻「鐵三角」或者3缺1,今晚要喺法定時間咬入拉素有啲難度。加上決賽場合例必踢得謹慎,寧願博1.68倍入球細。
 
(周四凌晨3時開賽)
 
今場決賽原本安排下月2日深夜舉行,但由於祖雲達斯打入6月3日深夜嘅歐聯決賽,意大利足總惟有將意盃決賽提前至今晚踢。對於祖記及拉素而言,都有些少倉促,特別係祖記上仗意甲惡鬥羅馬,半留力下輸波而回,未能提早衞冕聯賽。更加唔好彩係文迪蘇傑背部受傷,可能缺席今場王者戰,呢位克羅地亞國腳今季轉型左翼後,成為陣中進攻重心成員,即使教練阿里基輪換陣容,亦極少收起佢,若然文迪蘇傑真係缺陣,搵邊位球員補上拍希古恩同保羅戴巴拿,恐怕都難以發揮原本攻力。
 
近8次交手7鋪開細
事實上,祖雲達斯前兩屆捧盃過程都好驚險,包括前屆法定時間90分鐘同今場對手拉素打和1比1,加時險勝2比1;上屆決賽對AC米蘭都係要踢到加時,先至攻入全場唯一入球,所以唔好以為祖記今晚可以輕鬆捧盃。
 
拉素雖然近4仗轟入18球,但佢哋往往遇「祖」即屈,近9次對祖雲達斯竟然入得1粒,包括今季聯賽兩循環對碰,分別輸0比1及0比2,今場要攻破保方把守嘅大門,非常困難。以法定時間90分鐘計算,雙方近8次對賽,有7次總入球係2球或以下,捧入球細啱數。
流言情报