法達斯維:巴塞再戰祖記魯營大反擊

2017-04-19 06:00:32 来源:互联网

 
美斯保羅戴巴拿鬥入波
今晚歐聯8強次回合爆發生死戰,巴塞隆拿返主場再鬥祖雲達斯,亦是兩位「美斯」大對決。巴塞首回合輸0比3,冇得再縮一定要谷,球王美斯再次肩負起「開火」重責,好拍檔尼馬嚟緊聯賽「國家打吡」對皇馬要坐波監,佢唔使留力一定搏到盡,食住近10仗喺魯營主場出戰歐聯贏晒個勢,梗係想繼16強後再演超級大逆轉,但防線谷得太前,撞正好番嘅「新美斯」保羅戴巴拿率領嘅祖記快速反擊,隨時合演入球騷,大盤[3/3.5球]有買趁早。

(有線61、64、201及203台周四凌晨2時45分直播)

巴塞喺首回合作客畀祖記前場逼搶逼到頻頻斷纜,加上防中布斯基斯停賽下令防線冇晒掩護,被祖記嘅「新美斯」保羅戴巴拿省兩粒及基亞連尼頭槌建功慘敗0比3,連1個作客入球都搶唔到,已經企喺出局懸崖邊,今仗至少要入番3粒兼唔失波,先博到踢加時,真係需要奇迹。不過「地上最強」擅於創造奇迹,上圈16強硬撼巴黎聖日耳門(PSG),先喺首回合作客輸0比4,次回合返回魯營主場靠鋒線「MSN」美斯、蘇亞雷斯及尼馬共入4粒,連同對方烏龍波及沙治羅拔圖嘅絕殺贏6比1,兩回合計反勝6比5奇迹晉級,今仗梗係想重演超級大逆轉喇。

巴塞近10歐聯主場轟40粒
睇番巴塞近10仗歐聯主場出擊唔單止贏晒,而且合共狂轟40粒,證明巴塞喺魯營嘅主場威力超恐怖之餘,亦可見以「MSN」為首嘅鋒線火力唔係人咁品,球王美斯今仗又要孭重飛,而尼馬因嚟緊聯賽「國家打吡」對皇馬要坐波監,今仗更可無後顧搏甩髀,佢喺對PSG嘅次回合末段入2粒兼製造絕殺助攻,係成功逆轉嘅最大功臣,今仗隨時又嚟料。不過巴塞一向攻強守弱,特別係近年中場控球能力大不如前,令原本唔多穩陣嘅防線錯漏百出,單計今屆9仗歐聯已失咗12球,勍算布斯基斯刑滿復出,但中堅馬斯真蘭奴因傷上陣成疑,搞到教頭安歷基頭都痕埋。

祖記擅反擊 作客入到波
另一邊廂,祖記揸住3粒喺手,但主帥阿里基吸取PSG被淘汰嘅教訓,今仗造訪巴塞唔會齋守坐以待斃,睇準機會必拮多佢一刀,佢仲收到好消息,日前聯賽傷出嘅保羅戴巴拿已經復操,今仗好大機會可披甲,首回合佢飄忽走位兼速度堅快玩殘「地上最強」後防,加埋文迪蘇傑及希古恩,係祖記打反擊嘅殺着。遇啱今仗巴塞要焗攻,防線被迫要移前,令祖記有更多空位打反擊爭取作客入球,相信今仗會大手交易,一於捧[3/3.5球]嘅大盤。

流言情报