Mic少:米蘭打吡變中國打吡 港商注資AC受讓筍

2017-04-15 06:43:55 来源:互联网

 
繼國際米蘭之後,AC米蘭亦正式落入中資手上,呢支意甲老牌班霸前晚宣布,執掌球會31年嘅班主貝魯斯干尼已將99.93%股份出售畀由中國財團控制嘅體育投資公司Lux(Rossoneri Sport Investment Lux),總收購價達到7.4億歐元(約61億港元)。Lux主席李勇鴻係香港出生嘅富商,好大機會成為AC米蘭新揸弗人!意甲賽會好識做,將今晚「米蘭打吡」國際米蘭主場對AC米蘭,安排喺香港時間旁晚舉行,方便中國球迷睇波齊慶賀。

(TVB 302周六晚6時30分直播)

Lux上年夏天已同貝魯斯干尼達成收購協議,直至當地時間周四中午終於完成手續,李勇鴻向傳媒表示要令AC米蘭重振雄風:「多謝貝魯斯干尼同公司對我哋嘅信任,多謝所有支持者!AC米蘭係世界著名球會,所有球迷一直期待AC米蘭再創輝煌。我哋完成復興之路嘅關鍵一步,承諾會一步一步帶領呢支傳奇球隊重返世界球壇頂峰。」48歲嘅李勇鴻喺香港出世,曾經擔任香港安順企業有限公司董事兼總經理,之後去中國發展,成為收購AC牽頭人物,早前有傳佢準備安排AC米蘭來香港上市。

李勇鴻11億買人 鎖定法比仔
AC米蘭進入中資時代,勢將大事增兵,意大利財經報章《24小時太陽報》報道,「紅黑兵團」今夏會用1.4億歐元(約11億港元)買人,頭號目標已鎖定車路士中場法比加斯,呢位西班牙國腳今季喺車仔淪為後備,AC只要出得起錢,挖角難度唔算高。其他目標仲有愛華頓前鋒盧卡古同皇馬中場高華錫,另外同門神基安盧基當拿隆馬續約都係主要任務。中國國家隊主帥納比知道李勇鴻收購AC米蘭嘅消息後咁講:「AC應該一次性解決收購問題,喺中國都冇人知道AC米蘭背後金主係邊個,相反蘇寧集團收購國米就人盡皆知。」

至於今晚意甲「米蘭打吡」,AC米蘭受利好消息刺激,應該會喺新老闆面前做齣好戲。事實上,AC近9場意甲僅不敵榜首祖雲達斯,另外8場取得6勝2和。反觀國米兩連敗,狀態走下坡,讓唔起對手平半,捧AC米蘭下盤。
 

流言情报