2018世界盃投注錦囊之比利時攻略

2018-06-13 18:14:32 来源:互联网

世界盃舞臺向來都係由一眾足球傳統強國各領風騷,但喺今年嘅世界盃上,近年人才輩出嘅比利時卻隨時有力脫穎而出。如果話上屆喺巴西止步半準決賽更多係輸俾經驗嘅話,已經進入收成期嘅比利時如今已經有力叫板任何球隊。作為歐洲區外圍賽分組賽入球並列最多嘅隊伍,旺盛嘅攻擊力正係如今比利時最為令人畏懼嘅地方,夏薩特、迪布尼、梅頓斯和盧卡古等星級戰將皆能獨當一面,佢哋喺各支豪門當中亦係「大腿」般嘅存在,加上個個都正處於黃金年華,呢條攻擊線即使放眼全世界亦算係數一數二。當然比利時並非全無弱點,其中由中堅維頓漢領銜嘅後防線雖然正面防守力極為強勁,但穩重有餘靈活欠奉嘅頑疾卻實在需要門神高圖爾斯打醒十二分精神。不過正所謂強者運強,今屆決賽週被編入G組嘅比利時相信可以享受一個悠閒嘅分組賽之旅,皆因同組嘅突尼西亞及巴拿馬礙於經驗及實力上嘅巨大差距,陪跑味道甚濃。至於同組最大對手英格蘭雖然近年冒起咗唔少新星,但最為閉翳嘅就係就得當家射手夏利卡尼一個絕對進攻威脅。而且更為關鍵嘅就係比利時本身就有唔少將士喺英超搵食,對於英軍踢法可謂知根知底,只要發揮好本身串聯及把握能力上嘅優勢,就算係「夫添」嘅三獅軍團亦恐怕難奈歐洲紅魔。但對於志存高遠嘅佢哋嚟講,球隊如今嘅目標可算係司馬昭之心,但喺充滿變數嘅世界盃舞臺上,第一次帶隊征戰世界盃嘅領隊R.馬天尼斯肩上壓力之大可想而知,且看呢位西班牙教頭能否用好一手好牌替比利時足球創造歷史。

投注錦囊
憑藉強大無比嘅攻擊力,比利時往往並不畏懼讓數球之亞盤盤口。而鑒於同組部分球隊實力較弱,上盤亦需留意。

夏薩特 Eden Hazard
出生年月:1991年1月7日

位置:中場

身高:173cm

雖然迪布尼如今喺今季英超冠軍得主曼城已經逐漸成長為不可或缺嘅進攻核心,而盧卡古亦喺過去一季披上豪門曼聯嘅波衫並且盡顯射手本色,但要論當今比利時國家隊一哥,身披10號戰袍嘅隊長夏薩特則始終會係首選答案。作為常年被西甲兩大豪門皇馬及巴塞追逐嘅呢位車路士當家球星,自我搵食功底一流兼且喂球能力亦大有提升嘅佢早已喺英超賽場刻上咗屬於自己嘅烙印,無論係英超聯賽冠軍定係各類型年度最佳球員等獎項都曾被佢一一收入囊中。相反,夏薩特喺國家隊則一直缺少豐功偉績為自己嘅職業生涯乃至歷史地位所加持,可以講,喺步入27歲呢個球員嘅黃金年華之下,比利時一哥定必會喺今夏俄羅斯舞臺上發光發熱。

FIFA排名3

论坛精华