今晚英超快車上演倫敦打吡，熱刺主場硬撼水晶宮。熱刺依家淪落到要為護級搶分，但傷兵一大籮，要贏波唔易，水晶宮上場反輸堅唔抵，加上本身攻力麻麻，近年碰頭又旺少交收，轉捧2.5球入球細。
（Now 621及611周五凌晨4時直播）文:法達斯維
熱刺今季愈踢愈沉，踏入2026年踢咗10場聯賽，竟然未贏過，追平32年前球隊英超最長不勝紀錄，雖然炒咗教頭法蘭克，但新帥杜陀上任後未見起色，先後輸畀阿仙奴同富咸，夾埋錄得4連敗，依家已經淪為護級分子。
水晶宮鋒力唔掂守住先
當然杜陀亦有苦自己知，睇吓佢份傷兵名單水蛇春咁長，包括古度斯、威爾遜奧度拔等具爆破能力嘅翼鋒，而被寄予厚望嘅沙維西蒙斯又繼續迷失，令進攻冇晒方向，似乎杜陀都冇乜計。
另邊廂，水晶宮狀態亦一般，各項賽事近8仗贏得2場咁大把，包括擊敗包尾大幡狼隊，上場作客曼聯踢得好哋哋，更加早早領先，點知易邊後守將拿確斯「食全餐」，領紅牌兼輸12碼，最終反輸1比2，都幾打擊士氣。查實水晶宮今季踢咗28輪聯賽，先至入得30粒，未計今輪，其入波只係多過諾定咸森林同狼隊，而且拿確斯今仗亦要坐波監，預計會先做好防守，加上近3次碰頭全開2球或以下，2.5球嘅入球細咪錯過。
