今屆U23亞盃決賽上演「中日大戰」，由中國U23硬撼日本U23。小國足歷史性殺入決賽，以天才鋼門李昊為首嘅銅牆鐵壁，至今仍然保持不失，面對實力強勁嘅日本U23，絕對唔介意繼續死守，謀定而後動，半場和值得捧場。
（HOY TV 77台周六晚11時直播）文:法達斯維
中國U23之前5次參加U23亞盃決賽周，全部止步喺分組賽，嚟到今屆竟然屢創新高，唔單止突破分組賽，更加首度闖入決賽，令人喜出望外。查實中國U23今屆5戰只入4粒，其中3球係4強贏越南取得，攻力認真麻麻，但勝在防守固若金湯，5場全部保持清白之身，門將李昊居功厥偉，尤其係8強對住烏茲別克U23，惡戰120分鐘作出8次關鍵撲救，力保城池，最終藉互射12碼淘汰對手，靠住呢道猶如銅牆鐵壁嘅防線，有力同列強周旋。
輕裝上陣打消耗戰
另邊廂，日本U23實力唔使懷疑，今屆5戰法定時間4勝1和，特別係3仗分組賽贏晒兼入10球，初現冠軍相，不過踏入淘汰賽，面對約旦U23及南韓U23，合共只係入得2粒，進攻跌Watt嘅同時，亦反映出佢哋面對死守球隊，出現老鼠拉龜冇碇埋手嘅情況。
同肩負衞冕重任嘅日本U23相比，小國足今屆成績已經超額完成，有晒交代，冇太大心理壓力下隨時發揮得更好，加上初段主打消耗戰策略奏效，今屆5仗有4次開半場和，預計決賽會照辦煮碗，初段求穩一心死守，日本U23未必咬得入佢哋，半場和不妨再追。
