足球電視轉播步入「熊市」

2017-11-22 13:09:36 来源:互联网

就算唔熟經濟嘅讀者都知道,股票市場有牛市及熊市,而且近年多數時間都係牛市,但唔代表會一直有升冇跌。世界足球嘅發展亦一樣,近年出現「泰極否來」嘅情況,即係好到盡頭就會下滑,尤其係電視轉播方面,單單講歐聯,未計今周中,雖然分組賽剩番兩輪,但英超5雄、巴塞、皇馬、拜仁及聖日耳門嘅出線形勢基本大定,熟口熟面,未能於分組賽尾段掀起高潮,相信轉播收視未必如理想。

網絡興起影響甚大

踏入上世紀末至本世紀初,世界足球百花齊放,同時帶動起電視轉播、博彩市場嘅興旺,好多講波佬都係喺呢段時間入行。唔講你未必知,香港評述員講一場波,90分鐘定120分鐘都係收同一價錢,亦唔似其他行業般有雙糧花紅。隨住近年網絡嘅興起,對足球轉播收視影響極大,依家很多電視台都縮皮,一場波只搵一個評述員,甚至有啲索性只出英文聲,連廣東話評述都慳番,導致香港講波佬人數逐漸下降。筆者有幸為兩間電視台,於2010及2014年世盃做評述,查實佢哋都係蝕住嚟做,講番依家就到12月,至今竟然未有香港傳媒落實轉播明年6月嘅俄羅斯世盃,預計呢種足球轉播「熊市」,仍會延續一段時間。

金句

股票市場有牛市及熊市,世界足球亦有「泰極否來」。

论坛精华