恒大屠杀上港功亏一篑

2017-09-13 17:03:48 来源:互联网

photo_727996.jpg
恒大同上港亚冠半准决赛两回合210分钟比数。 有睇礼拜二晚亚冠嘅朋友相信隔咗一夜应该都意犹未尽,呢场历经两回合总共210分钟外加十二码先决胜负嘅「中超打比」过程确实荡气回肠。首先恭喜上海上港历史性闯入准决赛,佢哋击败嘅系中超霸主亦都系今届亚冠夺标大热广州恒大,出色嘅表现令赛果显得实至名归;而恒大方面,虽然遗憾无缘再添辉煌,不过行到今时今日都尽力而为。以下就让笔者浅谈一下呢轮将会成为佳话嘅对决以及对两队未来嘅展望。

边个都估唔到,首回合落后4波而且冇作客入球,恒大翻到主场竟然掀起进攻巨浪,阿兰高拉特先后喺法定时间内梅开二度扳平总比数,佢哋每一次破门都引发现场拥趸排山倒海嘅喝彩声,电视机前嘅观众都应该深深体会到嗰股力量,某啲时刻甚至以为自己身处天河体育场。去到加时,恒大乘胜追击祭出一招赶狗入穷巷,上港中场汪佳捷铲跌阿兰两黄变一红离场。虽然系咁,客军依然顽强守住主队嘅攻势,并且喺加时下半场由侯克通过罚球射入世界波再度领先;关键时候,今夏从巴甲回巢嘅穆里奇为恒大博到价值连城嘅犯规,球证判给十二码同时仲向上港后卫王燊超出示第二张黄牌,而操刀嘅高拉特不负所托一击即中。虽然踢多2个人,不过加时留畀恒大完成奇迹嘅时间实在有限,两回合210分钟踢完,彼此间技战术较量到此为止,老实讲,无论十二码结果系点,两队为大家奉献出嚟嘅本应用「未分胜负」嚟形容。

其实早喺睇到恒大法定时间成功追4粒嘅时候,相信所有观众应该会谂起年初发生嘅「巴塞奇迹」,再远啲嘅「名著」又有2005年「伊斯坦堡之夜」。足球场从来唔缺少逆转嘅好戏,球迷已经见证过太多奇迹,过往所有奇迹缔造者一一被载入史册,佢哋以胜利者姿态流芳百世,但另一边厢,输波嘅人难免被渐渐遗忘。同佢哋唔同嘅系,恒大呢一战绝对唔系败寇,面对「Mission Impossible」实现背水一战绝地反攻,而且令支持者睇到极大赢波曙光,就算最终带著一份悲情出局,起码系昂首退场。冇办法喇,奇迹唔系时时有,今年喺鲁营球场发生咗,幸运女神可能唔识路嚟广州囖,或者呢啲就系我哋一直享受所谓「足球嘅魅力」囖。

嚟紧今个周末,联赛战火继续点起,杀入亚冠四强嘅上港必定士气大振,虽然宜家落后紧8分咁多,不过仲有6轮唔一定系冇得追嘅,就算出尽全力都只系屈居亚军,起码都叫确保咗下届亚冠席位;虽然恒大染指亚冠锦标嘅美梦暂告一段落,但我哋熟悉嘅中超霸主肯定唔会气馁,就从寻晚呢场波已经睇得出。何况宜家都叫大比数领跑住中超积分榜,连续7季坐庄都算系叫紧糊嘅。点都好,希望呢两支为我哋奉献咗中国球坛史诗级对决嘅球队喺跟住落嚟都可以达成自己嘅目标。

论坛精华